नेपाली गजल : तिनै हुन् आमा

पसिना प्यासमा पिएको देखे, चिन्नु तिनै हुन् आमा
फाटेको फरिया सिएको देखे, चिन्नु तिनै हुन् आमा ।। १

छोडेन छोराको पिरले , छोडेन छोरीको शुर्ताले
दु:खमा जिन्दगी जिएको देखे, चिन्नु तिनै हुन् आमा ।।२

छोडेन पिठ्युँमा डोकोले, थाप्लोमा कहिलै नाम्लोले
हातमा हँसिया लिएको देखे, चिन्नु तिनै हुन् आमा ।।३

आफ्नो त वास्तै गर्दिनन्, सबैको भलो चिताउँछिन् 
खुलेर आशिष दिएको देखे, चिन्नु तिनै हुन् आमा ।।४

समय निर्दयी बनी दियो धार खेपिन् मार खेपिन्
अचानो झैँ गरी खिएको देखे , चिन्नु तिनै हुन् आमा ।। ५

By~ Bimal Raj