लामिछाने राम को नेपाली कविता

[ डाक्टर गोबिन्द के.सि. को समर्थन गरौ। ]

लुट्न के नै बाँकी रह्यो र हजुर,
बल हुनेले गोजिको पैसा लुटे !
छल गर्ने ले अर्काको घरजग्गा लुटे !
अनेक बहाना बनाएर यहाँ,
नेता बनेर देशको ढुकुटी लुटे !
कसैले पानी लुटे !
कसैले जवानी लुटे !
कसैले झुटा बकबास सुनाएर
जनताको सपना लुटे !
कागज मा पुल बनाएर
बिकास को मुल लुटे !
कागज मै रेल कुदाए,
कागज मै गाडी गुडाए,
कागज मै जहाज उडाए,
कसैले कुदाउने बहानामा लुटे !
कसैले गुडाउने बहानामा लुटे भने,
कसैले उडाउने बहानामा लुटे !
कहाँ कहाँ सहने ?
कति सम्म सहने ?
कहिले सम्म सहने ?
लुट्न के नै बाँकी छ र हजुर !
हामिलाइ भाग्य मात्र लुटेको भए
बाध्य भएर सहिन्थ्यो होला !
हेर्नुहोस त हाम्रो सास लुट्न
कसाइ उत्पादन गर्दै रहेछन !
कहिँ कलेज को नाउँमा,
कहिँ अस्पताल को नाउँमा,
हामी आज सम्म बेखबर थियौ !
ती सेता बस्त्रधारी कसाइका छुराले
हामी निर्बाध काटिँदा रहेछौ !
दबाइका नाउँमा बिष खुवाएर हामिलाइ,
निर्बाध हाम्रो घरबार लुटिरहेका रहेछन !
स्वेतबस्त्रधारी कसाइहरु चक्कु लिएर
हामिलाइ लठ्याएर निर्बाध रुपमा
हाम्रा अङ्ग काटिरहेका रहेछन !
काट्न त काटे तर निर्बाध अङ्ग लुटेर
हतियार हाम्रै शरीर भित्र
निर्धक्क कैद गरिरहेका रहेछन !
हामिलाइ लुट्न के के गरेनन !
कसाइ उत्पादन गर्न
छुट दिएर निर्बाध लुट्नेहरु
अरु कोहि नभएर
हाम्रै महामहिमहरु रहेछन !
कसकसले लुट्ने !
कसकसलाइ लुटाउने !
आवाज उठेको छ आज,
होस्टेमा हैसे गरेर
आफ्नो र आफ्ना सन्ततिको
रक्षा गर्न जुट्ने पो हो कि अब ।

Lamichhane Ram
लामिछाने राम