नेपाली गजल : ...... घर चर्काएर गयो भुकम्पले [ सर्जक : राजेन्द्र अर्याल (बसन्त ऋतु) ]

गजल 
अस्ति सम्म ठिकै थियो हिजो घर चर्काएर गयो भुकम्पले
कहिल्यै नरुने मान्छे म आज आँसु दर्काएर गयो भुकम्पले

धनले संसार जित्छु भन्ने ठुलो घमण्ड थियो म मा सदैब,
मेरो अघि धन केही होइन बुझ है भन्दै थर्काएर गयो भुकम्पले

ऋण असुल्न भनी गए ऋण लिनेको घर घरमा कराउँदै ,
हाम्रो बिपत्ति नबुझ्ने कस्तो मान्छे भन्दै झर्काएर गयो भुकम्पले।।


धनको सागरमा डुबि गुमाई सकेको रहेछु मानबता मैले ,
गुमाई सकेको मानवतालाई फेरि पनि फर्काएर गयो भुकम्पले।।

झुपडीमा बास बसेको छु ढलेपछि मेरो स्वर्ण महल आज,
हप्तौं पछि बल्ल पाएको खाना सर्काएर गयो भुकम्पले।।

मैले जस्तै धेरैले आफन्तहरू गुमाएका छन यहाँ आई हेर,
असह्य भो पिडाहरु मन मुटु नै मर्काएर गयो भुकम्पले

राजेन्द्र अर्याल (बसन्त ऋतु)
मेलम्ची २सिन्धुपाल्चोक
हाल अरबमा