नेपाली कविता : मामाको जन्तको तयारी [ प्रकाश अर्याल चुकुप्रकाश ]

प्रकाश अर्याल चुकुप्रकाश 

मलाई छिट्टै
कोट पाइन्ट सिलाउनु छ ।
फेसन अनुसार ,
थोरै टाइट सिलाउनु छ ।
कालो जुत्ता र कालो चस्मा मगाएको छु ।
यसैमा पैसा बगाएको छु ।
मलाइ अत्यन्तै हतार भै सक्यो
मिठा मिठा परिकार खानु छ ।
किनकि ,
मलाई मामाको जन्ती जानु छ ।


हाकिम साप !
मलाई एक हप्ताको बिदा मिलाइदिनुहोस
कोट सिलाएको छैन
दारी कपाल मिलाएको छैन
अर्डरको सामान लिनु छ
पैसा निकालेर दिनु छ ।
जानु पर्यो
आउनु पर्यो
समय त लागिहाल्छ नि ।
बाटो जाम हुन्छ
गाडीको लाम हुन्छ ।
यस्तै त हो नेपालको बाटो सानू छ ।
हो साप
मलाई छुट्टी दिनुहोस
किनकि
मलाई मामाको जन्ती जानु छ ।


म छिट्टै फर्कन्छु
आज जान्छु भोलि आउछु
मात्रै २ दिन त हो प्यारी !
पूरै बाटोभरि फोनमा बोलौला
एक्लोपनको पीडा त्यही खोलौला
खाना समयमा नै खानु
एक्लै पनि कलेज जानु
फेसबुकमा कुरा भैहाल्छ
जाबो २ दिन त हो यत्तिकै गैहाल्छ ।
मलाई बुझ काली
हामी केही दिन छुट्नै पर्छ
मैले पनि घर व्यबहार धान्नु छ ।
किनकि
मलाई मामाको जन्त जानु छ ।


साथी,
घरबाट सुको झर्दैन
कमाएकोले हाम्रो व्यबहार टर्दैन
लौन मलाई सहयोग गर
तिमी बाहेक मेरो को छ र
सुनकोशीमा प्रोजेक्ट परेको छ
काम अघि बढेन
म्याद सरेको छ
केही दिनमा
तेरो साथी मालामाल हुन्छ,
तँ हेर्दै जा,पैसो फालाफाल हुन्छ
तर यार ऐले २० हजार सापटी दे
यौटा बेल्ट पनि सँगै ल्याइदे
मेरो त सार्है अर्धानु छ ।
इमर्जेन्सी छ
किनकी
मलाई मामाको जन्त जानु छ ।



प्रकाश अर्याल 'चुकुप्रकाश'
धादिङ